Feeds:
Entradas
Comentarios

Archive for 18 de mayo de 2011

Aurten ere ez da falta izan EAJren mitina Bermeon

Posted in Uncategorized, tagged , on 2011/05/18| 4 Comments »

EAJ-ren Bermeoko zerrenda kudeatzen ibili direnek argi euki dute hasiera-hasieratik, hauteskunde hauetako kanpaina mitin eta guzti egin behar zela. Sasoi batean ez zegoen mitinik gabeko kanpainarik. Azken urteotan, ordea, nabarmen aldatu dira ohiturak eta zuzeneko mitinen bidez barik, hedabideen bitartez antolatu ohi da alderdi politikoen eta hautagaien komunikazioa. Are gehiago, irrati, telebista eta egunkarien indarra ikusita, alferreko ahalegintzat hartu izan du batek baino gehiagok mitinarena. Antolaketa-esfortzu izugarria eskatzen du, oro har, eta salbuespenak salbuespen, emaitza urriak baino eskasagoak eskuratzeko. «Oraindik ere mitinak antolatzen badira» aitortu zidan behin batean kontu horietan jakintsua eta oso ibilia den batek, «ez da hautagaien eta boto-emaileen arteko komunikazio ahalbideratzeko, komunikabideetan agertzeko baino; eta komunikabideak medio, jakina, mezua gizarte osoari helarazteko.

Bermeoko EAJren hautagaiok, alkateari babesa ematen

Ez zaie arrazoirik falta horrela pentsatzen dutenei. Baina hori bezain egi borobila da mitinak -gizakien arteko zuzeneko harremanak azken batean- ematen duen berotasuna ezin dezakeela inongo telebista edo egunkaririk ordezkatu. Informatu -ala desinfomatu baten baino gehiagotan- bai; erraz egin dezakete hori komunikabideek. Baina politikaren sentimenduak behar duen giza-berotasuna, urrundik ere ezin dezake bideratu pantaila hotzak edota paper-orri inprimatuak.

(más…)

Read Full Post »

Bermeoko frontoian, 1978ko abenduan

Posted in Uncategorized, tagged , on 2011/05/18| 15 Comments »

Gaur arratsaldean, mitina daukagu Bermeoko frontoian. Hori dela eta Iñaki Anasagastik argazki bat atera deust bere agortuezineko artxibo marduletik. Orain 33 urte, leku berean, frontoian, EAJ-k ospatu zuen mitin bateko irudia ikusten da bertan. Konstituzioaren erreferendumaren aurreko kanpainan ateratako argazkia da itxura guztien arabera. Horman zintzilik ikusten diren paperek «abstentzioa» eskatzen baitie botoemaileei. Beraz, 1978ko abenduan, ateratako argazkia da, gogoratzen ez duenarentzat. Esan bezala, laster beteko dira 33 urte. 

Ikusten denez, Anton Ormaza dago tribunatik berbetan. Eta mahaian, jesarrita, sasoiko beste jelkide batzuk. Gillermo Elgezabal –Ginbo- ikusten da eskuman. Bere ondoan, Iñigo Agirre diputatua. Eta erdi-erdian, Amaya Gaztelu.

Sasoi hartan, sinbologia argia erabili ohi zen, ekitaldi politikoen bukaeran kanta abertzaleak –Eusko gudariak gara, Aupa gizona jeiki mutil, eta horrelakoak- abesten zirenean. Ezkerreko jendeak ukabila jasotzen zuen eta ikurriñaren ondoan, bandera gorria erakustea zuen gustoko. Gorria baino, sobietarra: mailu, zerra eta guztiarekin. Berlingo arresia erori gabe zegoen oraindik eta, gezurra dirudien arren, asko ziren, alde honetan, beste aldekoen bizimodu goxoaz, eredukorraz, eta justiziaz beteaz hitz egiten zigutenak. Jelkideek, berriz, ikurriña eramaten zuten -ikurriña bakarrik; inola ere ez bandera gorririk- eta beso jasotzen zutenean, ez zen ukabila erakusteko, erdiko eta zuzeneko atzekin irabazpenaren V-a egiteko baino. «Irabaziko dugu» adierazi nahi zuen keinu horrek. «La V de la victoria» deitzen genion.

Asko aldatu dira gauzak harrez gero. Argazkian agertzen diren batzuk -Anton Ormaza eta Ginbo, esate baterako- joan zitzaizkigun betiko. Baina ideia eta baloreak ez dira hain erraz aldatzen. Eta hortxe dirau Amaya Gaztelu, 33 urte geroago, betiko pentsamolde eta printzipioekin. Lehen bezala, orain ere Euskadi askea gizon eta emakume askeez bakar-bakarrik osatu daitekeela aldarrikatzen du. Eta lehen bezala, gaur egunean, badaki jakin, balore horiek nekez defendatu daitezkeela ukabilaren sinboloak berarekin dakarrenarekin.

Kontua da, argazkiko mitin hartan V-a modurik sutsuenean erakusten ibili zen  bat  baino gehiago, ukabildunekin nahastuta -ala euren menpean?- agertzen zaigula gaur egunean.

Read Full Post »