Ehundaka pertsona batu gara gaur Bermeoko udaletxearen aurrean, Alakrana untziaren askatasuna aldarrika eskatuz, barruko gizonen senditartekoei babesa, hurbiltasuna eta solidartasuna adierazteko. Hogeita bi egun betetzen ditu gaur Alakranaren bahiketak. Ardura, kezka, neke, urduritasun eta egonezi ugariz betetako hogeita bi egun. Azken zortzi egunetan, ganera, senditartekoek ez dute barruko gizonekin komunikatzeko aukerarik izan. Egun latzak izan dira denentzat. Baikorren artetik baikorrena izanda ere ez baitago jakiterik komunikaziorik eza irratiaren itzalketari zor zaion ala beste arrazoi okerragoaren bategatik den. Gaur, zorionez, kapitainarekin, Iker Galbarriatu bermeotarrarekin berba egiteko parada izan du bere arrebak. Elkarrizketa laburra izan da, baina adierazgarria. Esanguratsua bezain pozgarria. Barruko gizonak ondo daudela denak esan dio Ikerrek bere arrebari. Eta horrek arnasa lasaitasunez hartzen utzi die gainontzeko guztiei.
Blog de Josu Erkoreka 